[家居宴客篇] 呢幾日天陰陰，成日想落雨咁，真係街都唔想出啊！但係放假又唔同啲朋友見下面，成何體統呀！咁唯有轉戰叫野返屋企食啦！作為一個走在潮流尖端嘅人，叫外賣都要潮過人架啦梗係！咁岩上網又見到有間叫白飯神偷有得訂醬油蟹喎，咪叫返屋企食囉！
咁岩上網見到呢間店舖標榜自己嘅醬油蟹係由韓國空運到港嘅梭子蟹，又好似好大隻咁，梗係要試吓啦！老老實實，五隻都要成$1600, 好似貴咗啲喎！不過人一世物一世，唔試過又對唔住自己嘅！咪試吓佢囉！呢間野嘅醬油蟹有辣味同埋唔辣嘅，但係由於我嘅朋友唔食得辣，咪叫個原味試吓囉！雖然送蟹個速遞遲咗成個鐘，個人已經炆炆地，但係個醬油蟹送到嘅時候，我真係忍唔住嘩左一聲！洗唔洗咁大盒啊！一打開，5隻蟹真係好巨型！同我之前去韓流村，真係大隻好多！不過醬油蟹呢家野，點會嫌大呀！好！即刻試吓佢先！
一揭開個蟹蓋，佢啲橙黃色嘅膏好似我既肥膏咁湧晒出嚟！搞到我都忍唔住將成碗飯倒晒落個蟹嗰度食！啲蟹膏，一個字！甜呀！如果唔係驚膽固醇超標，我一個人食晒五隻蟹既蟹膏都得呀！食完啲邪惡到極致嘅蟹膏之後，梗係要試吓佢個蟹身啦！佢D肉勁新鮮，勁甜！唔係我誇張，但真係比我之前食嘅新鮮好多！而且個醬油真係不得了！起碼唔會好似某D餐廳咁咁咸呀！如果你同我一樣偏好甜味嘅話，你一定愛死呢個醬油！個aftertaste 仲要微辣，正！搞到我食完之後，雖然未諗到要黎做乜，但都忍唔住要留返起個汁！
真係唔係話我崇韓，我真心覺得，如果要食韓國名菜醬油蟹，冇理由買啲唔係黎自韓國嘅蟹架嗎！雖然HKD$1600 5隻係有啲貴，不過間中俾貴小小食好啲當奬勵下自己都值得嘅！
白飯神偷
（係Facebook一search就會見到佢架啦！ ）
Search